«Василий Тёркин» — коми сцена вылын

Коми Республикаса вужвойтырлӧн шылада-драмаа театр дасьтӧ выль премьера – коми кывъя «Василий Тёркин» оперетта-сьыланкыв.

Быдӧнлы тӧдса да радейтана татшӧм жӧ нима Александр Твардовскийлӧн поэма серти опереттасӧ гижӧма нималана Россияса композитор Анатолий Новиков, либреттоыс – Пётр Градовлӧн. А коми вылӧ пьесасӧ вуджӧдіс кывбуралысь Анжелика Елфимова.

Спектакльсӧ сиӧма Айму вӧсна Ыджыд тышын вермӧмсянь 80 волы, Россияын Айму дорйысьлӧн волы да Комиын Геройяс волы. А сідзжӧ 2025 воын и поэмаыс, и авторыс пасйӧны юбилейяс: Александр Трифонович Твардовский чужӧмсянь 115 во (чужис 1910 вося июнь 21 лунӧ) да «Василий Тёркин» поэмалы 80 во (петӧма 1945 воын).

Медводдзаысь Коми муын режиссёралӧ Россияса театр искусствоын тӧдчана морт – Борис Наминович Манджиев - Россияса, Калмыкия Республикаса да Тыва Республикаса искусствоясын заслуженнӧй деятель, Калмыкия Республикаса томуловлӧн премияа лауреат, Азербайджанса культураын почёта уджалысь, Б. Басангов нима драма театрын художествоа уджӧн веськӧдлысь. Сійӧ воис Элиста карысь. Борис Наминовичкӧд йитӧдъяс театрлӧн заводитчисны 2023 восянь, кор Калмыкияса да Коми вужвойтыр театръяс «Большие гастроли» федеральнӧй программа серти ветлісны спектакльясӧн ӧта-мӧд дорӧ. Тайӧ режиссерыс уджалӧ оз сӧмын Калмыкияын, но и Россия пасьта уна театрын. 2024 воын сыӧн пуктӧм спектакль «Король лир» босьтіс «Золотая маска» россияса фестивальын «Аканьяс/Серпасасьысьлӧн удж» нимпас, а таво вит нимпасын номинируйтӧма сылӧн «Горе от ума».

Режиссёр вайӧдіс аскӧдыс дзонь команда, сідз, серпасасьысьӧн «Василий Тёркинын» лои Ольга Клопова, би-югыдӧн серпасасьысьӧн – Михаил Добрышин (кыкнаныс Санкт-Петербургысь), пластика кузя режиссёрӧн – Уфаысь Рамиза Мухаметшина – Башкортостан Республикаса искусствоясын заслуженнӧй деятель, Башкортостан Республикаса заслуженнӧй артистка, «Арлекин» Россияса вужвойтыр премияа лауреат.

Эз ӧтчыдысь Россия прӧйдитлы сьӧкыдлунъяс пыр, но век сюрлісны сэтшӧм геройяс, кодъяс лэптылісны ловсӧ да смеллунсӧ мукӧдлы, эз повны тышкасьны кулӧмлы паныд чужан му дорйигӧн и пыр кольлісны ясыд вежӧраӧн да эз воштыны шмоньливлунсӧ. Татшӧмъясыс кольӧны овны нэмъясын. Шӧр герой – Василий Тёркин – буретш сэтшӧмыс, коді отпырйӧ кужӧ и шмонитны, и петкӧдлыны повтӧмлунсӧ да авъялунсӧ. Збыль шуӧны, мый Тёркин – тайӧ роч салдатӧс ӧтувтан образ, и эз кӧ вӧв, то быть колӧ вӧлі думыштны быд роталы, взводлы ассьыс Тёркинӧс.

Шӧр рольяс ворсӧны: Александр Канев, Антон Куратов, Россияса заслуженнӧй артист Александр Ветошкин, Коми Республикаса народнӧй артисткаяс Алёна Гаранина, Елена Чувьюрова да Зоя Осипова, артистъяс Илья Карманов, Роман Поличенко, Никита Дербин, Данил Чудов, Карина Игнатова, Анна Терентьева да мукӧдъяс. Спектакль чӧж кутас ворсны ловъя оркестр.

Спектакльыс лоас петкӧдлӧма апрель 24 да 25 лунъясӧ, май 11 лунӧ театрлӧн сцена вылын 18.00 часын.