Театрын — Зарни юртаса сир

Аснога вӧравны, а ӧні нӧшта и гырысь чери кыйны радейтысьяс бара лоасны спектакльса геройясӧн.

"Зарни юртаса сир" премьера Коми Республикаса вужвойтырлӧн шылада-драмаа театрын петкӧдлас выль лоӧмтор тӧдса герояскӧд: 2011 воын петавліс «Сексот, или Особенности национальной охоты в Коми» Александр Суворовлӧн пьеса серти теш. Выль пуктасыс – тайӧ мӧд юкӧн, рочӧн сідзи и шусьӧ – «Царь-щука, или Особенности национальной рыбалки в Коми». Пьесаыс сідзжӧ Коми Республикаса кывбуралысь да драматург Александр Суворовлӧн, сцена вылӧ сійӧс пуктӧ Россияса искусствоясын заслуженнӧй деятель Светлана Горчакова. Комиӧдіс пьесасӧ Анжелика Елфимова.

Унаӧн, гашкӧ, помнитӧны геройяссӧ: Сергей Лоб (КР-са культураын почёта уджалысь Андрей Засухин), Богдан Вернигуб (КР-са народнӧй артист Андрей Епанешников), Павел Гусеев (Россияса заслуженнӧй артист Александр Ветошкин), Григорий Кочев (ворслісны Александр Кузнецов, Сергей Туркин, ӧні кутас ворсны Никита Дербин) да Лёха (ворсліс Владимир Уляшев, выль спектакльын ворсас Антон Куратов). «Сексотын» найӧс ылӧдліс да збыльсӧ восьтан зелляӧн юктӧдліс Кикимера, а ӧні Лӧкань ты бокын миян тӧдса геройяс оз жӧ лоны ас кежсьыс, выль приключение налы дасьтасны выль персонажъяс.

Сюрӧсыс гартчӧ зэв ыджыд сир гӧгӧр. И тайӧ абу мойд - татшӧм сиръясыс збыльысь коркӧ вӧдитчылісны Коми муын – Синдор, Кадам, Дон тыясын кывсьыліс на йылысь. Шуам, Кулӧмдін районса олысьяс сёрнитлісны, мый Кадам тыас олӧ вӧлі юр вылас кутшӧс новлысь ыджыд сир, коді вермас и мортӧс кыскыны ва пыдӧсӧ. Кадам тыын йӧзыс повлісны эз сӧмын варччыны, но и чери кыйны. Дыр тайӧ сирыс найӧс повзьӧдліс. Но сюрисны повтӧмъяс, кодъяс кыйисны тайӧ сирсӧ. Сійӧ вӧлӧма вывті ыджыд, а юрас збыльысь сатшкысьлӧма кутш да сідзи и вӧйлӧма, и кольӧма сыысь куш лыыс нин.

А кутшӧм сирӧс кутасны кыйны "Зарни юртаса сир" тешын, ті тӧдмаланныд премьера вылын! Петкӧдчӧмъясыс лоасны декабрь 25-ӧд лунӧ 18 часын да январь 5-ӧд лунӧ 16 часын.