«Парма» петкӧдліс коми культура Татарстанын

Август 22-24 лунъясӧ Казань бердса Крутушка посёлокын прӧйдитіс 15-ӧд войтыркостса «Крутушка» фестиваль.

Кӧні петкӧдчисны и коми сьылысь-ворсысьяс: Коми Республикаса вужвойтырлӧн шылада-драмаа театрса «Парма» фольклорно-этнографическӧй ансамбль – Россияса заслуженнӧй артист, Коми Республикаса народнӧй артист Александр Ветошкин, Коми Республикаса народнӧй артисткаяс Валентина Соколова, Галина Подорова, Зоя Осипова, Коми Республикаса заслуженнӧй артистка Альбина Карманова, Коми Республикаса Правительстволӧн премияа лауреат Владимир Уляшев, артист Александр Канев.

Площадкаыс ӧтувтіс Россияса енбиа йӧзӧс да уна пӧлӧс искусство: фестивальыс ӧтувтӧ шылад, йӧктӧм, сьылӧм, ас киӧн вӧчавны кужанлунъяс. Тайӧ семьяяслы традицияяскӧд, шыладъяскӧд, кипод уджъяскӧд тӧдмӧдан гаж. Асывсянь рытӧдзыс тані сьылісны-йӧктісны, нуӧдісны мастер-классъяс. Ярмарка вылысь позис ньӧбны ас киӧн вӧчӧмторъяс да велӧдчыны аслыд вӧчасьны быд сяма материалсьыс.

«Парма» петкӧдчис куимысь. Артистъяс нуӧдісны коми йӧзкостса шылада инструментъяс кузя мастер-класс, кӧні петкӧдлісны видзӧдысьяслы коми инструментъяс сикасъяс да на вылын ворсӧмсӧ. Видзӧдысьяс окотапырысь юасисны да нимкодясисны артистъяслӧн кужанлуннас. Мӧд мастер-класс нуӧдісны коми йӧзкостса йӧктӧмъяс кузя. Фестиваль вылӧ воӧмаяс тӧдмалісны, мый комияслӧн йӧктӧмъясыс чужлісны чипсан да пӧлян шы улӧ, кор ныла-зонма вӧлі локталӧны видзьяс вылысь. Сідзжӧ йӧктылісны сигудӧк улӧ, но сылӧн вӧв си шыыс вӧлі сэтшӧм лӧнь, мый йӧктысьяслы ковмыліс пӧрччывлыны кӧмнысӧ. А коми культураӧ гудӧк воӧм бӧрын, дерт, йӧктӧмъясыс лоисны ёна мӧдджыкӧсь нин. Фестивальса йӧктан кытшын гӧстьяс велӧдісны «Пармалысь» йӧктан воськовъяс да элементъяс, а сэсся ставӧн йӧктісны коми кадриль. Окотитысьыс вӧлі уна. Гажӧдчисны и гӧстьяс, и артистъяс. Коймӧд петкӧдчӧмӧн вӧлі медшӧр сцена вылын концерт, кӧні быд рыт сьылісны-ворсісны став воӧм коллективыс.

Фестивальын петкӧдчисны солистъяс да ансамбльяс Арменияысь, Иранысь, Исландияысь, Болгарияысь, Бурятия, Калмыкия, Якутия республикаясысь, Москваысь, Санкт-Петербургысь да Россияса уна мукӧд карысь. Фестивальын вӧліны татшӧм нималысь артистъяс, кыдз Сергей Старостин, Надишана, Ay Yola, «Торама».

«Парма» ансамбльӧ пырысь Александр Ветошкин пасйис: «Тайӧ зэв тӧдчана, кор выльысь петан войтыркостса тшупӧд вылӧ, мунан фестиваль вылӧ кыпӧдны ловтӧ, а нӧшта и мукӧдлысь кӧ сьӧлӧмсӧ вӧрзьӧдан – тайӧ нӧшта на бурджык.»

Миян участникъяс пасйисны фестиваль дасьтӧмлысь вылі тшупӧдсӧ, техника боксянь тшӧтш. Тайӧ вӧлі Россияса да суйӧрсайса войтыръяслӧн ловъя историялӧн да культуралӧн гаж. Быд коллектив юксис аслас торъя тӧдӧмлунъясӧн – йӧзкостса сьыланногсянь ӧні аранжировкаӧдз, нор балладасянь тэрыб да гажа ритмъясӧдз.